२२ आश्विन २०७७, बिहीबार || 08 Oct 2020, Thursday

सूर्य जी बोलीमा पक्का हुनुहुन्छ

राजधानी भालुवाङको चर्चा चलेको त्यो दिन

सूर्य थापाले भन्नुभयो, प्रदेश राजधानी बन्ने ठाउँ नै भालुवाङ हो । तिमिहरुले कार्यक्रम गरेर भालुवाङको बारेमा चर्चा चलायौ
- शोभाखर पन्थी

राजधानी भालुवाङको चर्चा चलेको त्यो दिन

 

असोज २१ गते २०७७

नेपाल पत्रकार महासंघ प्रदेश समितिले दुई बर्ष पहिले भालुवाङमा आयोजना गरेको मिडिया सम्मेलनमा प्रदेश राजधानी भालुवाङमा नै बन्नुपर्छ भन्ने बलियो आवाज उठेको थियो ।

त्यहाँ उपस्थित नेताहरूले राजधानीको निम्ति भालुवाङ नै उपयुक्त स्थान रहेको भनी मन पग्लाएका थिए । हामीलाई कार्यक्रम राख्नको निम्ति प्रेरित गर्ने मित्रहरू पनि निक्कै खुसि थिए । हामी पनि महान सहिद कृष्णसेन ईच्छुकको भग्नावशेष को रुपमा रहेको निवासमा उहाँको स्मरणमा कार्यक्रम गर्न पाउँदा निक्कै हर्सित थियौं । अझै राजधानी नै बनाउने कुरा चल्दा दङ्ग पनि ।

मलाई कार्यक्रमको संयोजन गर्ने जिम्मेवारी दिईएको थियो । देशैभरी बाट आएका अगुवा पत्रकार नेता र प्रदेशका साथीहरूको व्यवस्थापन गर्नु पर्दा मैले सबैको भाषण राम्रोसँग सुन्न पाईन । जतिको सुने राप्ती नदीको किनार,कृष्णसेन ईच्छुकको घर भालुवाङको निक्कै ठुलो महत्व रहेको अनुभुती गरें ।

कार्यक्रम सकिए लगत्तै नेपाल कम्युनिस्ट पार्टी नेकपाका नेता, अग्रज पत्रकार सूर्य थापा र नेपाल पत्रकार महासंघका अध्यक्ष गोविन्द आचार्यले हामीलाई बधाई दिनुभयो । दुबै जनाको भनाई थियो यो कार्यक्रमको ऐतिहासिक महत्व रहनेछ । उहाँहरुले भन्न खोज्नु भएको कुरा मैले बुझिन अनि नेता सुर्य थापा लाई सुटुक्क सोधें त्यस्तो खासमा के भयो र सर ? मेरो प्रश्न सकिन नपाउँदै सूर्य थापाले भन्नुभयो, प्रदेश राजधानी बन्ने ठाउँ नै भालुवाङ हो । तिमिहरुले कार्यक्रम गरेर भालुवाङको बारेमा चर्चा चलायौ ।

उहाँको भनाइमा म सहमत हुन सकिन तर सुर्य जी को अगाडि बिरोध जनाउने हिम्मत पनि भएन, अनि होला र ? मात्र भने, उहाँले भालुवाङको पुल नजिकै उभिएर मलाई नोट गरेर राख भनी प्रेसर गर्नु भयो । म पनि हो भन्न बाध्य भएँ ।

सूर्य जी बोलीमा पक्का हुनुहुन्छ भन्ने कुरा मलाई बाल्यकाल देखि नै थाहा थियो तर यो कुरामा म पुर्ण रुपमा बिश्वस्त हुन सकिन । सायद सूर्य थापाको अलावा अरु कुनै नेताले मलाई त्यो कुरा भनेको भए मैले पटकपटक गफको तालमा हजुरको भालुवाङ राजधानी कहाँ पुग्यो भनेर गिज्याउने थिएँ । नेता थापालाई भन्ने साहस ममा भएन ।
समय अन्तर सँगै करीब ८, ९ महिना पहिले सबैको जित हुनेगरी बुटवल र कपिलवस्तु गोरुसिङे बीचको आसपास क्षेत्रमा सहमति गरी राजधानी राखौं भनी अर्घाखाँचीका प्रदेशसभा सदस्य चेतनारायण आचार्यले बताउँदा एक थरी बुटवलवाला नेताले उहाँको खेदो नै खने । उहाँको बिरुद्धमा तथानाम समाचार लेखाए । हामीले प्रतिवाद गर्न खोज्यौं तर आचार्यले घरको कुरा हो किन झगडा गर्ने साथिहरुले पछि संझनु हुन्छ चुप लाग भनेपछि हामी रोकियौं ।

अहिले समय फेरिएको छ । अब भालुवाङ प्रदेश राजधानी हुने कुरा करीब करीब टुंगिएको छ । सायद चेतनारायण आचार्यहरुले भनेको समयमा बुटवल बाहेक थोरै आसपासको ठाउँ लाई पनि स्वीकार्न सकेको भए स्थिति सहज थियो । सहमतिमै राजधानीको बिषय टुंगिने थियो । बुटवलका बाहेक अरु मान्छे नै होइनन् भन्ने मनोगत सोच भएकाहरुको एकोहोरो रटान र प्रतिपक्षी दल नेपाली कांग्रेसको अकर्मण्यताका कारण अब प्रदेश राजधानी भालुवाङ बन्नुको बिकल्प रहेन । प्रदेश सरकारले प्रस्ताव ल्याए पनि नेकपाका केहि सांसदहरूले बिकल्पमा छलफल गर्न जोडदार माग गरेका थिए । सरकार पनि सोच्न बाध्य बन्दै थियो । प्रतिपक्षी दलले यो कुरा बुझ्यो र आन्दोलनमा गएर राम्रै फाईदा पुग्ने ठान्यो । उसले कोरोना लाई पनि बिर्सिएर कार्यकर्ता सडकमा ल्यायो । उसका कार्यकर्ताले सडकमा टायर मात्र बालेनन् नेकपाका नेताहरूलाई लक्षित गर्दै उनीहरू सवार गाडिमा तोडफोड गरे । उनिहरुले स्वयं मुख्यमन्त्री शंकर पोख्रेलको गाडिको समेत सिसा फुटाए ।

कांग्रेसका सांसदहरूले प्रदेश सभाको बैठक चलिरहेको समयमा त्यहाँ भएका टेवल कुर्सी फुटाउने, माईक भाँच्ने जस्तो तान्डव नृत्य देखाए । यि सबै घट्नाक्रमले अब नेकपाका सबै सांसदहरूलाई एक ठाउँमा उभिन बाध्य पार्यो । उनिहरुले अब निर्णय गर्न जति ढिलो गर्नेछन् त्यति स्थिति अराजक र उदण्डतामा जानेछ ।स्थिति बिग्रदै जाँदाको परिणाम कल्पना बाहिरको पनि हुन सक्छ । हिजो बुटवल बाहिर ठाउँ नै छैन भन्दै टसमस नै हुन नखोज्दा भालुवाङ पुग्नुपर्ने अबस्था आएजस्तै अझै लफडा गर्दै जाने हो भने भोलि घोराही पुग्नुपर्ने अबस्था पनि आउन सक्छ ।

पन्थीको यो धारणा अर्घाखाँची डट कममा प्रकाशित छ

प्रतिक्रिया दिनुहोस