इन्डियन प्रिमियर लिग २०२६ अन्तर्गत सोमबार सम्पन्न खेलमा सनराइजर्स हैदराबादले चेन्नई सुपर किंग्सलाई पाँच विकेटले पराजित गर्दै प्लेअफमा आफ्नो स्थान सुरक्षित गरेको छ । जितसँगै हैदराबाद प्रतियोगिताको अन्तिम चारमा पुग्न सफल भएको हो भने चेन्नईको सम्भावना निकै कमजोर बनेको छ ।
चेन्नईले दिएको १८० रनको लक्ष्य पछ्याएको हैदराबादले १९ ओभरमै पाँच विकेट गुमाएर लक्ष्य पूरा गर्यो । टोलीको जितमा इशान किशनले शानदार प्रदर्शन गर्दै ४७ बलमा ७० रनको महत्वपूर्ण इनिङ खेले । उनले इनिङ सम्हाल्दै टोलीलाई सहज अवस्थामा पुर्याएका थिए ।
हेनरिक क्लासेनले पनि आक्रामक ब्याटिङ गर्दै २६ बलमा ४७ रन बनाए । अन्तिमतिर सलिल अरोराले अविजित १० रन तथा आर. स्मरनले पाँच रन जोड्दै टोलीलाई जितसम्म
पुर्याए ।
चेन्नईका बलरमध्ये मुकेश चौधरीले दुई विकेट लिए । अकील हुसेन, नूर अहमद र अंशुल कम्बोजले समान एक–एक विकेट हात पारे ।
यसअघि टस जितेर पहिले ब्याटिङ गरेको चेन्नईले निर्धारित २० ओभरमा सात विकेट गुमाउँदै १८० रन बनाएको थियो । टोलीका लागि सञ्जु सामसनले १३ बलमा २७ रन बनाए भने कार्तिक शर्माले १९ बलमा ३२ रनको योगदान दिए ।
डेवाल्ड ब्रेभिसले २७ बलमा ४४ रन बनाएर टोलीलाई मजबुत अवस्थामा पुर्याएका थिए । शिवम दुबेले २६ रन जोडे । ब्रेभिस र शिवमबीच पाँचौँ विकेटका लागि ५९ रनको महत्वपूर्ण साझेदारी भएको थियो ।
हैदराबादको बलिङतर्फ कप्तान प्याट कमिन्स उत्कृष्ट देखिए । उनले चार ओभरमा २८ रन खर्चेर तीन विकेट लिए । शकिब हुसेनले दुई विकेट लिए भने इशान मालिंगा र प्रफुल हिङ्गेले समान एक–एक विकेट हात पारे ।