इन्डियन प्रिमियर लिग (आईपीएल) २०२६ अन्तर्गत अहमदाबादमा सम्पन्न खेलमा गुजरात टाइटन्सले चेन्नई सुपर किंग्सलाई ८९ रनले पराजित गर्दै प्लेअफ यात्रालाई थप मजबुत बनाएको छ । यो हारसँगै पाँच पटकको च्याम्पियन चेन्नई आधिकारिक रूपमा प्रतियोगिताबाट बाहिरिएको छ ।
नरेन्द्र मोदी स्टेडियममा गुजरातले दिएको २३० रनको विशाल लक्ष्य पछ्याएको चेन्नई १४० रनमै समेटियो । सुरुवातदेखि दबाबमा परेको चेन्नईका शीर्ष ब्याटरहरू टिक्न नसक्दा टोली खेलमा फर्किन सकेन ।
चेन्नईका लागि कप्तान ऋतुराज गायकवाड, म्याथ्यु सर्ट र कार्तिक शर्माले छोटो योगदान दिए पनि ठूलो साझेदारी बन्न सकेन । शिवम दुबेले १७ बलमा आक्रामक ४७ रन बनाउँदै केही आशा जगाएका थिए । तर उनको विकेट पतन भएपछि चेन्नईको इनिङ छिट्टै समाप्त भयो ।
गुजरातको बलिङमा मोहम्मद सिराज, कागिसो रबाडा र राशिद खानले समान तीन–तीन विकेट लिए । सिराजले सुरुआती ओभरमै चेन्नईलाई ठूलो झट्का दिएका थिए । उत्कृष्ट प्रदर्शनका लागि सिराज ‘प्लेयर अफ द म्याच’ घोषित भए । उनले तीन ओभरमा २६ रन खर्चेर तीन विकेट लिएका थिए ।
यसअघि पहिले ब्याटिङ गरेको गुजरातले निर्धारित २० ओभरमा विशाल २२९ रन बनाएको थियो । कप्तान शुभमन गिलले आक्रामक सुरुआत दिलाउँदै टोलीलाई मजबुत अवस्थामा पुर्याए । साई सुदर्शनले सर्वाधिक ८४ रन बनाए भने जोस बटलरले पनि अर्धशतक पूरा गर्दै टोलीलाई विशाल योगफलसम्म पुर्याए ।
गिल र सुदर्शनबीच शतकीय साझेदारी भएको थियो । त्यसपछि बटलर र सुदर्शनले पनि उत्कृष्ट समन्वय गर्दै चेन्नईका बलरमाथि लगातार दबाब बनाएका थिए ।
चेन्नईका बलरहरूले सुरुवातदेखि नै लय समात्न सकेनन् । स्पिनर नूर अहमद प्रभावहीन देखिए भने तीव्र गतिका बलरहरूले डेथ ओभरमा रन रोक्न सकेनन् । गुरजपनीतले केही नियन्त्रण कायम राखे पनि टोलीलाई राहत दिन पर्याप्त भएन ।
जितपछि गुजरात १८ अंकसहित शीर्ष दुईमा रहँदै प्लेअफ नजिक पुगेको छ । उत्कृष्ट रनरेटका कारण उसको शीर्ष दुईमा रहने सम्भावना अझ बलियो बनेको छ ।
खेलपछि कप्तान शुभमन गिलले टोलीले निरन्तर राम्रो क्रिकेट खेलेको भन्दै यही लय कायम राख्नुपर्ने बताए । उनले प्लेअफअघि टोली आत्मविश्वासले भरिएको पनि उल्लेख गरे ।
यता चेन्नईका कप्तान ऋतुराज गायकवाडले गुजरातले सबै विभागमा आफूहरूलाई पछि पारेको स्वीकार गरे । उनले चोटका कारण टोलीको सन्तुलन बिग्रिएको र महत्त्वपूर्ण खेलाडीहरूको अनुपस्थितिले असर परेको बताए । साथै उनले युवा खेलाडीहरूको प्रदर्शन भविष्यका लागि सकारात्मक रहेको प्रतिक्रिया दिए ।
अब आईपीएलमा अर्को महत्वपूर्ण खेलमा सनराइजर्स हैदराबाद र रोयल च्यालेन्जर्स बेंगलुरुबीच प्रतिस्पर्धा हुनेछ । उक्त खेलले शीर्ष दुई टोलीको समीकरण लगभग टुंगो लगाउने अपेक्षा गरिएको छ ।