साउन २५ गते २०८३ /निराजन वि.क
आज साउन महिनाको अन्तिम सोमबार देशभरका ब्रत बसेका हिन्दु महिलाहरुले आज ब्रत समापन गर्दैछन् । कोहलपुर नगरपालिका वडा नं २,वडा नं १५ स्थित शिवमन्दिर र देशभरका शिवालयमा आज ब्रत बसेका महिलाहरुको घुइचो लाग्नेछ ।
हिन्दु धर्मशास्त्रले अरु सोमबार ब्रत बस्न नपाए पनि आज अन्तिम सोमबार ब्रत बसि भगवान शिवको पुजा आराधना गरे मनोकामना पुरा हुने विश्वास गरिन्छ । साउन महिनाको सोमबार देवहरुका देव महादेवको प्रिय सोमबार भएकाले पनि साउन महिनाका सोमबारहरु मा ब्रत बस्ने गरेको पाइन्छ ।
आज ब्रत बसेर अराध्यदेव महादेव लाई मनपर्ने फलफुल चढाएर दान दक्षिणा गरेर पुजा आराधना गरेर आर्शिवाद लिइने धार्मिक विश्वास रहेको पाइन्छ । आज विवाह नभएकाहरुले असल पति पाउ भनि र विवाह भएकाहरुले पतिको दिर्घ जीवनको कामना गरेर ब्रत बस्ने गरेको पनि बताइन्छ ।
साउन महिनाको यो साल २०८३को अन्तिम सोमबार सोमप्रदोष व्रतको संयोग परेको धर्मशास्त्रीहरुले बताउनु भएको छ ।
सोमबारको दिन त्रयोदशी तिथी परेमा सोमप्रदोष भनिने र आजको दिन झन् उत्कृष्ट दिन परेको शास्त्रीहरुको विश्लेषण छ ।
सूर्यास्त अघि र पछिको समय लाई प्रदोष भनिएकाले साँझ सूर्यास्त आसपासको समयमा शिव मन्दिरमा गएर दूध, दही, घ्यु, बेलपत्रले पूजा गर्दै पहेँलो चिज चढाएमा शुभ हुने सुख, शान्ति र समृद्धि मिल्ने हिन्दु धर्मशास्त्रीहरुले बताउनु भएको छ ।
आज सुनसरीको बराह क्षेत्रमा पुगेर पानी ल्याई धरानको पिण्डेश्वरमा जल चढाउने बोलबम,डाकबमहरुको पनि अचाकली घुइचो लाग्छ । धर्मशास्त्रीहरुले आज शिवालयमा पुगेर जलअर्पण गर्ने लाई महादेव प्रशन्न भई प्रशस्त आशिष दिनुहुने बताइएको छ ।
काठमाडौंको पशुपति, भक्तपुरको डोलेश्वर, ललितपुरको कुम्भेश्वर, पूर्वको महादेव भनेर चिनिने हलेसी, सुनसरीको पिण्डेश्वर, म्याग्दीको गलेश्वर, कपिलवस्तुको कुशेश्वर, पर्वतको गुप्तेश्वर, जनकपुरको कपिलेश्वर, जलेश्वरको सिरेश्वर र कलानेश्वर, दाङको धारपानी लगायतका शिवालयहरुमा पनि बिहानैदेखि भक्तजनको घुइँचो लागेको छ ।