भाद्र २० गते २०८३
शुक्रबार रातिदेखि परेको अविरल वर्षासँगै बाजुराको वीरेखोला झरनामा भीषण बाढी आउँदा २३ परिवार विस्थापित भएका प्रहरीले जनाएको छ ।
बाजुराको सदरमुकाम मार्तडीस्थित बडीमालिका नगरपालिका–६ र ८ को सीमामा पर्ने वीरेखोला झरनामाथि पहिरोले खोला थुनिएर बनेको ताल फुटेपछि बाढी आएको स्थानीय लालसिंह साउँदले बताउनु भयो ।
साउदले बाढीले मानवीय क्षति तथा घरमा प्रत्यक्ष क्षति नगरे पनि गाउँको बीचबाटै ठूलो बाढी आएपछि २३ परिवार विस्थापित हुनु परेको बताउनु भयो । उहाँले बाढीको कारण थप १८ परिवारसमेत जोखिममा रहेको बताउनु भयो ।
बडीमालिका नगरपालिका–६ का कार्यवाहक वडाध्यक्ष परे बडुवालले बाढीले ४१ परिवार प्रभावित रहेको र बाढीले एक माछा पोखरी, दुई वटा पानी घट्ट र वीरेखोला झरनाको टिकट काउन्टरमा क्षति पुर्याएको जानकारी दिनुभयो ।
उहाँले किसानको धानबालीसमेत बगाएर खेतलाई बगरमा परिणत गरेको बताउनु भयो ।
बाढीपछि बिस्थापित २३ परिवारलाई सुरक्षित स्थानका सारिएको कार्यवाहक वडाध्यक्ष बडुवालको भनाइ छ ।