असोज १३ गते २०८३
नेपालगन्ज — बाँकेको दुर्गम मानिने पूर्वी सीमानामा पर्ने नरैनापुर गाउँपालिकामा आन्तरिक राजस्वसम्बन्धी सेवा संचालन हुने भएको छ । कर सम्बन्धी सेवाको पहुँच स्थानीय तहसम्म विस्तार गर्ने उद्देश्यले आन्तरिक राजस्व कार्यालय नेपालगन्ज र नरैनापुर गाउँपालिकाबीच समझदारी भएको हो ।
यससँगै नरैनापुर क्षेत्रका बासिन्दा तथा व्यवसायीले करसम्बन्धी सेवा लिन अब हरेकपल्ट नेपालगन्जस्थित कर कार्यालय धाउनुपर्ने बाध्यता हट्नेछ । सरकारले २०८२ कात्तिक १७ मा गरेको करदाता सेवा कार्यालय खारेज गरी स्थानीय तहमार्फत सेवा संचालन गर्ने निर्णय कार्यान्वयन गर्दै स्थानीय तहमा आन्तरिक राजस्वसम्बन्धी सेवा विस्तार गरिएको जनाइएको छ ।
आन्तरिक राजस्व कार्यालय नेपालगन्जबाट हुँदै आएको सेवा बुधबारदेखि नरैनापुर गाउँपालिकाको आन्तरिक राजस्व शाखामार्फत उपलब्ध हुने भएको हो । यसअघि पान नम्बर लिनुका साथै अन्य आन्तरिक राजस्वसम्बन्धी कामका लागि जिल्ला सदरमुकाम नेपालगन्ज पुग्नुपर्ने बाध्यता थियो ।
नरैनापुर गाउँपालिकाका अध्यक्ष इस्तियाक अहमद शाहले आन्तरिक राजस्वसम्बन्धी सेवाले पालिकावासीलाई सहज हुने बताए । यो सेवा संचालनले स्थानीय तहले आफ्नो क्षेत्रभित्र बसोबास गर्ने व्यक्तिलाई व्यक्तिगत स्थायी लेखा नम्बर प्राप्त गर्न सहजीकरण हुनेछ ।
त्यसैगरी, अन्तःशुल्क इजाजतपत्र आवश्यक पर्ने व्यवसायका लागि आवश्यक कागजात मिलान गरी आन्तरिक राजस्व कार्यालय नेपालगन्जमा सिफारिस गर्ने तथा इजाजतपत्र प्राप्त गर्ने प्रक्रियामा सहजीकरण गरिने उनले बताए ।
मूल्य अभिवृद्धि कर (भ्याट)मा दर्ताका लागि आवेदन दिने व्यक्ति तथा व्यवसायका आवश्यक कागजात मिलान गरी आन्तरिक राजस्व कार्यालयमा सिफारिस गर्ने र दर्ता प्रमाणपत्र उपलब्ध गराउन सहजीकरण गर्ने व्यवस्था गरिने पनि समझदारीमा उल्लेख छ।