प्रदेश ५ मा सञ्चालन भएको आठौं राष्ट्रिय खेलकुद प्रतियोगिता बुधबार सकिएको छ । नेपालगञ्ज रंगशालामा आयोजित समापन समारोहमा कार्यवाहक राष्ट्रपति नन्दबहादुर पुनले प्रतियोगिताको समापन गरे ।
समापन कार्यक्रममा बोल्दै उनले आठौं राष्ट्रिय खेलकुद प्रतियोगिताको कमी कमजोरी नवौं प्रतियोगितामा नदोहोर्रुयाउन सुझाव दिए । आफ्नै प्रदेशमा भएको आठौं खेलकुदले सबैलाई एक बनाएको भन्दै गण्डकी प्रदेशमा हुने नवौं राष्ट्रिय खेलकुद प्रतियोगिता झनै भब्य हुने उनले कामना गरे । नवौं राष्ट्रिय खेलकुद प्रतियोगिता गण्डकी प्रदेशमा २०७७ सालको फागुन २० देखि २७ गतेसम्म हुने राष्ट्रिय खेलकुद परिषद्ले निर्णय गरिसकेको छ । उनले भने, विशेषगरी बाँके र दाङमा भएको यो आठौं राष्ट्रिय खेलकुदले सबैलाई एक बनाएको छ । यहाँबाट प्रतिभावान खेलाडीको जन्म पनि भएको छ । म बधाई दिन चाहन्छु राष्ट्रिय कीर्तिमान बनाउने खेलाडी तथा पदक विजेतालाई ।
उपराष्ट्रपति पुनले आफू राष्ट्रिय प्रतियोगितामा सानोमा छनोट हुन नपाउँदा एकदमै दुख लागेको सुनाउँदै खेलाडीलाई झनै हौसलाको साथ खेल्न आग्रह गरे । उनले १३ औं दक्षिण एसियाली खेलकुद प्रतियोगिता तोकिएकै समयमा सम्पन्न हुने आशा पनि व्यक्त गरे । उनले भने, म विश्वस्त बनाउन चाहन्छु कि नेपालमा हुने १३ औं साग तोकिएकै समयमा हुनेछ । अब त्यसको तयारीमा लाग्नुहोस् । १३औं दक्षिण एसियाली खेलकुद प्रतियोगिता यही डिसेम्बरमा काठमाडौं र पोखरामा हुदैछ ।
आर्मीको अग्रता नेपाली सेना विजेता बन्न सफल भएको छ । सेनाले १३५ स्वर्ण, ७७ रजत र ६६ काश्य पदक सहित विजेता बन्न सफल भएको हो ।
यसैगरी दोश्रो स्थानमा रहेको एपिएफले ५१ स्वर्ण, ६५ रजत र ७० काश्य पदक प्राप्त गरेको छ । नेपाल पुलिस क्लबले ४९ स्वर्ण,५५ रजत र ४४ काश्य पदक प्राप्त गरेको छ । प्रदेश नम्बर ३ ले २२ स्वर्ण, २३ रजत र ३९ काशय पदक हात पारेको छ । गण्डकी प्रदेशले १२ स्वर्ण, २१ रजत र ४३ काश्य पदक, प्रदेश ५ ले ११ स्वर्ण, २६ रजत र ४८ काश्य पदक प्राप्त गरेको छ । प्रदेश १ ले ९ स्वर्ण, २० रजत र ५९ काशय पदक प्राप्त गरेको छ । यसैगरी सुदुरपश्चिम प्रदेशले ८ स्वर्ण, १२ रजत र ३४ काश्य, प्रदेश २ ले ६ स्वर्ण, ७ रजत र २० काश्य, एलआरएनएले ५ स्वर्ण १ रजत र ५ काश्य तथा कर्णाली प्रदेशले ३ स्वर्ण, ४ रजत तथा १७ काश्यपदक प्राप्त गरेको छ । विजेता टिम तथा खेलाडीलाई कार्यबाहक राष्ट्रपति नन्दबहादुर पुन लगायतले बुधबार साँझ नेपालगञ्ज रंगशालामा ट्रफी प्रदान गरे । बैशाख ५ गते उद्घाटन भएको प्रतियोगिताका खेलहरु चैत २७ देखि सुरु भएका हुन् । प्रतियोगितामा ३५ खेलमा पाँच हजार बढि खेलाडी प्रतिष्पर्धी थिए ।