‘
कार्तिक २२ गते २०८१
चलचित्र ‘पूर्ण बहादुरको सारङ्गी’ले दर्शकको उत्साहजनक साथ पाएको छ । सिनेमाले दर्शकको उत्साहजनक साथ पाउँदा शो थपिने क्रम जारी छ । हरेक दिन यो चलचित्रको शो थपिने क्रम जारी छ ।
चलचित्र वितरक प्रचण्डमान श्रेष्ठले ४५ देखि ५० प्रतिशत शोसहित ‘पूर्ण बहादुरको सारङ्गी’ चलिरहेको बताएका छन् । यति शो दिँदा पनि दर्शकले आफूले चाहेको समय र हलमा चलचित्र हेर्न नपाएको उनको दाबी छ ।
यो चलचित्र आउँदो तीन हप्तासम्म दर्शकको उच्च चापसहित चल्ने उनको दाबी छ । त्यसैले तत्काल चल्ने चलचित्रलाई सहज बनाउने हो भने ७५ देखि ८० प्रतिशत शो आजैबाट दिएर ‘पूर्ण बहादुरको सारङ्गी’ चलाउनु पर्ने अन्यथा रिलिज हुने तयारीमा रहेका चलचित्रलाई समस्या पर्नसक्ने उनको दाबी छ ।
अन्यथा आगामी हप्तामा प्रदर्शनमा आउने केही चलचित्र ड्रप र केहीको प्रदर्शन मिति परिवर्तन गर्न पहल थाल्न सुझाव दिएका छन् । समयमै यो पहल नगरे कसैलाई फाइदा नहुने वितरक प्रचण्डमानको भनाइ छ ।
वैशाख १४ रिलिज भएको ‘बोक्सीको घर’ले वैशाख २१ मा रिलिज भएको ‘मनसरा’को शो ‘क्याप्चर’ गरेको थियो । ‘मनसरा’ले सुरुमा पाएको शो पनि दोस्रो र तेस्रो दिनदेखि नै ‘बोक्सीको घर’ले लिएको थियो । त्यस्तै संकेत देखिएको वितरक प्रचण्डमानले गरेका छन् ।
सरोज पौडेलले निर्देशन गरेको चलचित्र ‘पूर्ण बहादुरको सारङ्गी’मा विजय बरालसँगै प्रकाश सपूत, मुकुन भुसाल, अञ्जना बराइलीलगायत कलाकारको मुख्य भूमिका छ ।
चलचित्रमा संवाद महेश दवाडीले लेखेका छन् । निर्माता विनोद पौडेल र प्याट्रिक सुवेदी हुन् ।
कार्यकारी निर्मातामा रमेश चौलागाईं, हरि श्रेष्ठ र रमेश ढकाल छन् ।
साभार १२खरी